2015 йилнинг биринчи ярмида “Ўзбекистон ҳаво йўллари” МАК хизматларидан 1 млн 235 минг йўловчи фойдаланди. Компанияга тегишли авиалайнерлар томонидан 11575 та рейс амалга оширилди, 18,3 минг тонна юк ва почта ташилди.

МАК жорий йилнинг март ойидан иккита қайта жиҳозланган “Боинг” юк самолётларидан фойдаланишни бошлади. Бу юк йўналишлари тармоғини кенгайтиришга ва “Навоий” халқаро интермодал логистика маркази орқали юк ташишлар ҳажмини оширишга имкон берди. Шу давр ичида Тошкент-Минск-Тошкент мунтазам рейси очилди. Авиакомпания ходимлари томонидан МАК йўналиши бўйича сайёҳлик оқимини жалб қилиш ва Ўзбекистон сайёҳлик соҳасини ривожлантириш бўйича мақсадли йўналтирилган иш олиб борилди.

Ҳукумат томонидан қабул қилинган қарорларга мувофиқ, МАКда 12 та инвестицион лойиҳа амалга оширилмоқда. Уларга кўра, ҳаво кемалари паркини янгилаш, “Боинг-787 Дримлайнер” самолётларига техник хизмат кўрсатиш ангари ва янги “Тошкент-4” йўловчи терминалини қуриш, аэропортларнинг ердаги инфратузилмасини ривожлантириш ва уларни махсус аэропорт техникаси ва техник воситалари билан жиҳозлаш кўзда тутилган.