Венанинг Швехат аэропортида маҳаллий полиция Украинага ўқотар қурол билан кетаётган бир гуруҳ АҚШлик ҳарбийларни ушлаб қолди.

Curier нашрининг ёзишича, аэропорт ходимлари томонидан юк текширилаётганда АҚШлик ҳарбийларда М16 милтиқлари ва тўппончалар борлиги аниқланган ва уларга рухсат бўлмаган.

Нашр маълумотларига кўра, ушбу воқеа бир неча кун аввал юз берган. 9 нафар америкалик ҳарбий Вашингтондан Украинага топшириқ бажариш учун кетаётган бўлган.

Нашрнинг аниқлашича, америкалик ҳарбийлар зарур рухсатларни олишни унутиб қўйишган.

"Баъзи ҳолларда Австрия мудофаа ва ташқи ишлар вазирликлари тинчликпарвар операциялар, машғулотлар ва шунга ўхшаш тадбирларда иштирок этаётган хорижий ҳарбийлар сафарига ижозат бериш ҳуқуқига эга. Бироқ АҚШлик ҳарбийларда бундай рухсат бўлмаган”, деб таъкидлади Австрия мудофаа вазирлиги вакили Михаэль Бауер.

АҚШ элчихонаси томонидан “қайноқ излар” бўйича берилган сўров Австрия томонидан рад этилган. Шундан кейин АҚШлик ҳарбийлар Вашингтонга жўнаб кетаётган самолётда ортга қайтишга мажбур бўлишган. Уларга қурол-аслаҳаларни олиб кетишга рухсат берилган.