Ўзбекистоннинг ўн минглаб аҳолиси Ўзбекистонда нанотехнологиялар асосида ишлаб чиқарилаётган маҳсулотлардан, жумладан, бактерицид ва даволаш хусусиятини бериш мақсадида кумуш нанозарралари қўшилган бир қатор гигиеник воситалардан фойдаланиш имкониятига эга бўлишмоқда.

Ўзбекистон Республикаси Ядро физикаси институти катта илмий ходими Ренат Ҳайдаровнинг маълум қилишича, 2014 йилда Республика ихтисослаштирилган дерматология ва венерология илмий-амалий тиббиёт марказида олиб борилган клиник синовлар ишлаб чиқарилаётган кумуш нанозарралари эритмалари яллиғланишли тери касалликлари, жумладан экзема, контакт дерматит, микоз ва бошқаларда ёрдам беришини кўрсатди.

Нанотехнологиялардан электроника, биология, тиббиёт, энергетика, материалшунослик ва бошқа соҳаларда фойдаланилади. Улар ёрдамида цемент, керамика, металл қотишмалар, лак-бўёқ ва бошқа ноёб материаллар ишлаб чиқарилади. Охирги йилларда кумуш, углерод, мис, титан ва бошқа элементларнинг нанозарраларини синтез қилиш учун энергия сиғимдор бўлмаган технологиялар ва қурилмалар ишлаб чиқилган.

Ўзбекистон корхоналари бу технология ва қурилмалардан мамлакат иқтисодиётини ривожлантириш йўлида кенг фойдаланиш имкониятига эга бўлмоқда.