Ўзбекистон автомобиль ва дарё транспорти агентлигида 2015 йилнинг январь-июнь ойларида бажарилган ишларга бағишланган матбуот-анжумани бўлиб ўтди.

Анжуманда агентлик мутахассислари ва ОАВлар вакиллари иштирок этдилар.

Анжуман давомида агентлик жорий йилнинг биринчи ярмида ўз фаолиятини 2015 йилнинг 16 январида Ўзбекистон Республикаси Вазирлар Маҳкамаси томонидан қабул қилинган “2015 йил учун тармоқлар тадбирлари дастури”га мувофиқ олиб бориши таъкидлаб ўтилди.

Кўрилаётган давр ичида автотранспорт тармоғига киритилган инвестициялар миқдори 77,6 млрд сўмни ташкил қилгани, 15 йил ичида фаолият кўрсатаётган йўловчи ташиш йўналишлари 2313тага кўпайиб, 4317тага етгани, улардан 990таси шаҳар ичи, 2708 таси шаҳар ташқариси ва 619 таси шаҳарлараро йўналишлар экани таъкидлаб ўтилди.

Шунингдек, ташқи иқтисодий фаолият соҳасида ҳам ишлар олиб борилаётганига тўхталиб ўтилди. Хусусан, жорий йилнинг баҳорида агентлик вакиллари Мадридда Ўзбекистон ва Испания қироллиги билан икки томонлама ҳамкорликнинг ҳуқуқий-келишув асосини янада кенгайтириш масалалари бўйича мутахассислар учрашувида иштирок этдилар. Учрашув давомида Ўзбекистон ва Испания ўртасида халқаро автомобиль боғланиши ҳақидаги келишув лойиҳаси матни келишиб олинди.

Бундан ташқари, Ўзбекистон ва Хитой ўртасида халқаро автомобиль боғланиши ҳақидаги янги келишув лойиҳаси ишлаб чиқилди.

Ҳозирда ҳужжатлар Ўзбекистон Вазирлар Маҳкамасига кўриб чиқиш учун топширилган.