"Пекин-2022" мурожаат қўмитаси Халқаро олимпия қўмитаси аъзоларини Хитой пойтахти ушбу олимпиадага меҳмонлик қилган тақдирда спорт объектларида қор етишмовчилиги келиб чиқмаслигига ишонтирди. Бу ҳақда қўмитанинг 128-сессияси чоғидаги тақдимот пайтида Хитой олимпия қўмитаси раиси Лю Пэн маълум қилди.
2022 йили XXIV қишки Олимпия ўйинлари ва XIII Паралимпия ўйинларига меҳмонлик қилувчи шаҳар 31 июль куни Халқаро олимпия қўмитасининг навбатдаги сессиясида яширин овоз бериш йўли билан аниқланади. Пекиндан ташқари, мезбонликка Олма-Ота шаҳри ҳам даъвогарлик қилмоқда.
ХХР раиси Си Цзиньпин Халқаро олимпия қўмитаси аъзоларига йўлланган видеомурожаатида Пекиннинг ғалаба қозонишини Хитойнинг 1.3 млрд аҳолиси истаб турганини таъкидлаб ўтди.
“Биз ўз мажбуриятларимизни тўлалигича амалга оширамиз. Ишонтириб айтаманки, сиз Пекинни танласангиз, биз ажойиб қишки ўйинларни ўтказамиз”, – деди у.
Овоз беришда ХОҚнинг 100 аъзосидан 85 нафари иштирок этади. Сайловда кўпроқ овоз олган шаҳар ғолиб бўлади.