Хитой пойтахти – Пекиннинг 2022 йилги қишки Олимпия ўйинлари пойтахти қилиб танланиши Халқаро Олимпия қўмитаси учун хавфсиз ва тарихий қарор бўлди, деб айтди Куала-Лумпурда бўлиб ўтган ХОҚнинг матбуот-анжуманида ХОҚ президенти Томас Бах.

31 июль куни ХОҚнинг 128-сессиясида Пекин 2022 йилги қишқи Олимпия ва Паралимпия ўйинларини қабул қилиши эълон қилинди. Пекин тўрт овоз устунлик билан ўз рақиби – Олма-ота шаҳри устидан ғалаба қозонди (44-40).

“Бу хавфсиз ва тарихий танлов бўлди. Чунки Пекин энг юқори даражадаги мусобақаларни ўтказиш бўйича катта тажрибага эга. Биз буни бошқа халқаро ташкилотлар каби яхши биламиз. Тарихий воқеа бўлиши эса Пекин ҳам ёзги, ҳам қишки Олимпия ўйинларини ва шу билан бирга 14 йил фарқ билан ўтказадиган биринчи давлат бўлади”, деб айтди Бах.

2008 йилда Пекинда ёзги Олимпия ўйинлари ўтказилган эди.

Шу тариқа Олимпия ўйинлари кетма-кет уч марта Осиё қитъасида ўтказиладиган бўлди (Пхенчхан-2018 ва Токио-2020).

Пекинда мусобақалар учта жойда: марказий Пекинда (очилиш маросими, фигурали учиш, шорт-трек, хоккей, кёрлинг, конькида югуриш), Пекиннинг шимоли-ғарбий уезди Яньцинда (тог-чанғи спорти, бобслей, чана спорти, скелетон) ва Чжанцзякоу шаҳрида (чанғи пойгалари, трамплиндан сакраш, биатлон, фристайл, сноуборд) ўтказилиши режалаштирилмоқда.