31 июль куни Ўзбекистон Республикаси Ахборот технологиялари ва коммуникацияларини ривожлантириш вазирининг биринчи ўринбосари Файзуллаев Алишер Насибуллаевич бошчилигида Uzinfocom Компьютер ва ахборот технологияларини ривожлантириш ва жорий этиш марказида йиғилиш ўтказилди.

Бу йиғилишда вазир ўринбосари вазирликнинг 2015 йил 30 июлдаги буйруғи билан Ғайратхўжа Сайдалиев Uzinfocom Компьютер ва ахборот технологияларини ривожлантириш ва жорий этиш маркази директори этиб тайинлангани ҳақида маълум қилди.

Маълумот учун, Ғайратхўжа Сайдалиев 1982 йил Тошкент шаҳрида туғилган. У 2002 йилда Низомий номидаги Тошкент давлат педагогика университетини тамомлаган. Сайдалиев Uzinfocom марказидаги фаолиятини 2011 йилда Компьютерлаштириш марказларига кўмаклашиш гуруҳи бошлиғи лавозимида ишлаш орқали бошлаган. Бироз ўтиб Uzinfocom маркази директори ўринбосарига айланган.

2014 йилнинг январида Ғайратхўжа Сайдалиев ўз карьерасини Uzinfocom маркази директорининг биринчи ўринбосари лавозими билан давом эттирган, 2015 йилнинг 9 мартида Uzinfocom маркази директори вазифасини вақтинчалик бажарувчи этиб тайинланган эди.