Покистон пойтахти Исломобод шаҳрида Туркманистон-Афғонистон-Покистон-Ҳиндистон газ қувури лойиҳаси бўйича ҳамкорлик доирасидаги томонларнинг учрашуви ташкил этилади.

Учрашувда лойиҳанинг навбатдаги босқичи ҳақида муҳокама ўтказилиши режалаштирилган.

«Туркменистан: золотой век» нашри берган хабарда айтилишича, Покистонга Туркманистон Вазирлар Маҳкамаси вакили Боймурот Ҳожимуҳаммедов ва президент ҳузуридаги углевод ресурсларидан фойдаланиш ва бошқариш вгентлиги директори Яхшикелди Какаев йўл олади.

Учрашув 3 август кунига белгиланган.

Эслатиб ўтамиз, 2014 йилда Туркманистон, Афғонистон, Покистон ва Ҳиндистон давлат газ компаниялари янги компания таъсис этганди. У 1800 километрлик Туркманистон-Афғонистон-Покистон-Ҳиндистон (ТAПҲ) газ қувурини қуриб, сўнг унга эгалик қилади ва ундан фойдаланади.

Тўртала мамлакат ҳам янги компания капиталида тенг улушга эга бўлган. Осиё тараққиёт банки ТAПҲ газ қувури лойиҳаси бўйича транзакциявий маслаҳатчи этиб тайинланган.

ТAПҲ қувури 30 йил давомида Туркманистондан Афғонистон, Покистон ва Ҳиндистонга йилига 33 миллиард кубометр табиий газни экспорт қилиши мўлжалланган.