Хитой Халқ Республикаси раиси Си Цзиньпин Хитой делегациясини 2022 йилги Олимпия ўйинлари мезбонлигини қўлга киритилгани билан муборакбод этди. Бу ҳақда Ўзбекистон Миллий Олимпия қўмитаси матбуот хизмати хабар қилди.

“Сизлар ушбу жараёнда улкан ишни амалга оширдинглар. Умид қиламанки, Хитой халқининг қўллаб-қувватлаши орқали, бўлажак Олимпия ўйинларини фантастик даражада ўтказиш йўлида ҳам самарали меҳнат қилишда давом этасизлар – дейди ўз табрик мактубида Си Цзиньпин.

2022 йилги қишки Олимпия ўйинлари Пекин шаҳрида ўтказилиши эълон қилингач, бутун Хитой аҳли ҳушхабарни нишонлай бошлади. Овоз бериш жараёнини тўғридан-тўғри олиб борган ССTV бошловчиси, Хитой делегациясининг барча аъзолари каби қувонч кўз ёшларини тия олмади.

Пекин шаҳридан 70 чақирим узоқликда жойлашган Буюк Хитой деворининг “Бадалинь” ҳудудида аждарҳолар рақси бошланиб кетди. Ушбу тарихий воқеилик Пекин шаҳрида Олимпия паркида, шунингдек, Пекин шаҳридан 200 км узоқликда жойлашган Чжанцзякоу шаҳрида ҳам кенг тантана қилинмоқда.

2022 йилги қишки Олимпиада ўйинлари февраль ойида ўтказилади. Маълумки, худди шу пайтда Хитойда янги йил кенг нишонланади. Шу боис, Хитойликлар мазкур Олимпиада ўйинларини ҳақиқий байрамона рухда ўтказишга ваъда беришмоқда.

Жумладан, Пекин шаҳри мэри Ван Аньшунь ҳам 2022 йилги қишки Олимпиада ўйинлари Хитой пойтахтида ўтказилиши эълон қилинганида қувончдан кўзларига ёш олган ва барчани миллий анъанага кўра янги йилда оилавий истеъмол қилинадиган хитой чучварасини татиб кўриш учун Пекин шаҳрига таклиф қилган. Шаҳар мэри, шунингдек, Пекин шаҳри билдирилган ишончни оқлаш учун бор имкониятни ишга солажаклигини билдирди.