Рио-де-Жанейрода бўлиб ўтадиган 2016 йилги Олимпия ўйинларида сузувчилар ва эшкакчилар ифлослиги даражаси бўйича оқава сувларники билан баробар бўлган сув ҳавзаларида иштирок этишларига тўғри келади, деб хабар бермоқда ушбу ҳолат бўйича ўтказилган тадқиқот натижаларига иқтибос келтирган ҳолда Associated Press ахборот агентлиги.

Мусобақалар ўтказиладиган Родригу-ди-Фрейташ кўли, Гуанабара бўғози, Копакабана ва Ипанема пляжларидаги сувлардан 37та намуна олинди. Намуналар таҳлил қилингач, бу жойлардан бирортаси ҳам сузувчилар саломатлигига хавфсиз эмас деб топилмади.

Калифорниялик олимлар ўтказган таҳлиллар асосида журналистлар бу жойлардаги сувларда одам учун хавфли миқдорда вирус ва бактериялар борлигини таъкидлашмоқда. Бу ҳолат сувлар одам фаолиятининг чиқиндилари билан катта миқёсда ифлосланганлиги билан боғланган. Агентликнинг таъкидлашича, мусобақалар ўтказиладиган сувлардаги зарарли микроорганизмлар миқдори Жанубий Калифорния пляжларида ўрнатилган хавфли даражадан 1,7 млн маротаба кўпроқни ташкил қилади.

“Бу сувлар деярли тозаланмаган оқава сувлардир”, деб изоҳ бермоқда денгиз биологи Жон Гриффит. Олинган сув намуналарида аденовируслар, ротавирус ва нажас ичак таёқчалари Бразилия қонунчилигида кўзда тутилган меъёрлардан ҳам анча кўп миқдорда эканлиги аниқланган.

Бразилия ҳукумати Олимпиада учун атайлаб тозалаган Родригу-ди-Фрейташ кўли энг ифлосланган сув ҳавзаси деб топилди, бу ерда 1 литр сувда 14 млн дан 1,7 млрд гача аденовируслар аниқланган.

Бразилиядаги Олимпиадада сув спорти турларида 1,4 мингга яқин спортчи қатнашади.