2005 йили Франция ташқи ишлар ва халқаро ривожланиш вазирлиги томонидан ташкил этилган Марказий Осиё неолити бўйича археологик экспедиция (МАФАНАК) 28 июль куни Самарқанддаги Яҳё Ғуломов номидаги археология институтида 10 йиллигини нишонлади.
Айни пайтда экспедицияга Франциянинг CNRS-UMR 7041 илмий тадқиқот маркази ходими Фредерик Брюнэ ва археология институти ходими Муҳиддин Хўжаназаров бошчилик қилмоқда.
Тадбирда миссиянинг уч нафар вакили – Гурген Давитян (CNRS-UMR 7264 муҳандис тадқиқотчиси), Ҳикматулла Ҳошимов (археология институти) ва Летиция Мундутэги (археологияда чизиш техникаси бўйича мутахассис), шунингдек, институт директори Амриддин Бердимурадов, докторантлар, халқаро Марказий Осиё тадқиқотлар институти (IICAS-UNESCO) директори Пило Парк, Афросиёб музейи директори Самариддин Мустафоқулов ҳамда СамДУ археология ўқитувчилари Нона Аванесова ва Нормуҳаммад Ҳолматовлар иштирок этишди.
Экспедиция вакиллари иштирокчиларига ўзлари шу йиллар мобайнида олиб борган ишлар бўйича маърузалар қилиб беришди. Шунингдек, экспедиция бундан буён Марказий Осиёда Франция археология экспедицияси (МАФАК) деб аталиши ҳақида ахборот бериб ўтилди.
Эслатиб ўтамиз, экспедиция м. ав. VII-VI минг йилликларга оид Калтаминор археологик маданиятини тадқиқ этиш билан шуғулланган. Тадбирда ушбу маданият ёдгорликларидан топилган ашёлар тақдимоти бўлиб ўтди.