Ўзбекистон табиатни муҳофаза қилиш қўмитасининг расмий сайтида (Uznature.uz) социологик сўров ўтказилмоқда.
Қўмита матбуот хизматининг маълум қилишича, сўровнома ўтказишдан кўзланган мақсад сайт аудиториясини аниқлаш ва ташкилий масалалар бўйича, хусусан, ишонч телефонлари самарадорлиги борасида уларнинг фикрини ўрганишдир.
Таъкидланишича, саволлар имкон қадар содда тузилган. Жумладан, улар респондентнинг корхонаси қандай иқтисодий фаолият билан шуғулланиши, улар қўмита ходимларининг коррупцияга қўл уриш ҳолатларини кузатган-кузатмаганлиги, ишонч телефонлари самарадорлигининг баҳоси сингари масалаларга қаратилган.
Шунингдек, коррупция ҳақидаги саволга қўшимча равишда, респондент бу ҳолат қандай вазиятда кузатилганини кўрсатиши мумкин: Ўзбекистонга таркибида озонни бузувчи моддалар бор маҳсулот олиб киришга рухсатнома олиш, ўсимлик дунёси объектларидан фойдаланишга махсус рухсатнома олиш, Қизил Китобга киритилган ёввойи ўсимликларни олиб чиқиб кетишга рухсатнома олиш ва ҳоказо.
Шунингдек, қўмита сайт фойдаланувчилари кўрсатилаётган интерфаол хизматларни янада такомиллаштириш борасида таклиф ва тавсиялар билдиришидан умид қилмоқда.