Марҳум афсонавий хонанда Уитни Хьюстоннинг ягона фарзанди – яқинда ҳаёт билан видолашган Бобби Кристина Браун Атлантада онасининг қабри ёнига дафн қилинди, деб хабар бермоқда TMZ портали.

Дафн маросими Уитни Хьюстон мусиқалари садоси остида ўтди. Қиз онасининг Jesus Loves Me (“Исо мени яхши кўради”) мусиқаси остида дафн қилинди.

Марҳуманинг отаси, Уитни Хьюстоннинг собиқ эри, реп ижрочи Бобби Браун қизининг дафн маросимига келмади, у қизи билан “Мен ҳам сени доим севаман” деган сўзлар ёзилган видолашиш мактуби билан хайрлашди.

Бобби Кристина Браун ўтган якшанба куни Жоржия штатидаги шифохоналардан бирида бир неча ой комада ётгандан кейин 22 ёшида вафот этгн эди.

Уитни Хьюстоннинг ўзи эса 2012 йилнинг 12 февралида Beverly Hilton меҳмонхонасида вафот этган. Хонанда барча мол-мулкини қизига мерос қилиб қолдирган эди.