Швейцариянинг Гштаад шаҳрида теннис бўйича “Suisse Open Gstaad” турнири ўз якунига етиб бормоқда. Ушбу мусобақада иштирок этган ўзбекистонлик теннисчи Денис Истомин жуфтлик баҳсида ғалаба қозониб, бош мукофотга эга чиқди.

Беларуслик шериги Александр Бурий билан баҳсларга киришган Ўзбекистоннинг биринчи ракеткаси финалда австриялик Оливер Марах ва покистонлик Айсам-ул-Ҳақ Қурейши жуфтлигига қарши кортига чиқишди.

Бу ўйинда 3:6, 6:2, 10:5 ҳисоблари қайд этилди ва Ўзбекистон ҳамда Беларусь вакилларидан иборат жуфтлик ғалаба қозонди.

Маълумот учун, ATP World Tour 250 туркумидаги бу турнирнинг мукофот жамғармаси 440 минг евродан иборат эди. Яккалик баҳслари ғолиби 80 минг, жуфтлик баҳсларида ғалаба қозонган теннисчиларга эса 24,800 евродан берилади. Шунингдек, ғолиблар 250 рейтинг очкосига эга бўлишади.

Шу тариқа, Истомин АТР турнирларидаги учинчи титулига эга чиқди, Бурий учун эса бу биринчи соврин бўлди.

Денис Истомин бу ғалаба орқали жуфтликлар рейтингида бирданига 70 поғона юқорилади ва 112 ўринга жойлашди. Унинг яккалик рейтингидаги ўрни эса 71 ўрин ҳисобланади.