Шимолий Африкада истиқомат қилувчи эркак жомадон ичида яшириниб Испанияга келмоқчи бўлди, аммо ярим йўлда оламдан ўтди. EFE агентлигининг маълум қилишича, беш соат давом этган саёҳат давомида эркак нафас ололмай қолган.
Жомадон автомобиль ичида бўлган, автомобилни эса ҳалок бўлган муҳожирнинг укаси бошқариб кетаётган бўлган. Машина юклар билан паромга ортилган. Паром Альмерия қирғоқларига етганида ҳайдовчи акасининг мазаси қочганлигини маълум қилган. Қутқарувчилар уни жонлантиришга муваффақиятсиз ҳаракат қилишган.
2015 йил майида ҳам шунга ўхшаш ҳолат содир бўлган эди. Ўшанда испаниялик чегарачилар рентген ёрдамида жомадон ичида яширинган 8 ёшли болакайни топиб олишган эди. У Испанияда яшаётган ота-онасининг олдига кетаётган эди.