Facebook ижтимоий тармоғидаги Potrebitel.uz гуруҳида пайдо бўлган янги трэдлардан бирида ўзини Korzinka.uz супермаркетлар тизими муаллифи деб таништирган муаллиф гуруҳ фойдаланувчиларининг тизим ҳақидаги фикрларидан норози эканлигини билдирди.
“Аввал, ўзимни таништирай. Мен Зафар Ҳошимов, шу супермаркетлар тизими раҳбариман, – деб ёзади у. – Мен бу корхонада унинг биринчи кунидан бери ишлайман… Бизнинг корхонанинг ўзида икки мингдан зиёд ватандошларимиз муносиб иш жойига эга бўлиб, ўзлари, оила, бола-чақаларининг ризқларини топиб юришибди”.

Зафар Ҳошимов ижтимоий тармоқдаги муҳокамаларда супермаркетлар тизими ҳақида асоссиз гаплар тарқатилганини ва бундан норозилигини билдирди: “Бир ФБ гуруҳида қизиқ бир музокарага дуч келиб қолдим. Унда бизнинг корхонани “юртимиз ўрислари очган” деб бошланган саҳифа эътиборимни ўзига жалб этди”.
Шунингдек, пост муаллифи Korzinka.uz номининг рус тилида эканлигига эътироз билдирганларга жавоб берди.

“Korzinka.uz брендига келсак, биз бу брендни яратишда олдимизга юқори мақсад ва интилишларни қўйганмиз ва шу ниятларимиз сари ҳаракат қилаяпмиз. Бу ниятимиз ушбу брендни нафақат Ўзбекистонда, балки яқин ва узоқ хориж мамлакатдарида ҳам таниқли брендга айлантиришдан иборатдир. Брендларга хос бир хусусият уларнинг универсаллигидадир. Яьни, масалан, Coca Cola, Apple, Tesco брендлари ҳар янги мамлакатга борса номини ўзгартирмайди. Шунинг билан бир қаторда, биз бу брендни яратишимиз негизида келажакда кенгайишимиз белгиланган мамлакатдарда ҳам бизнинг бренд тушунарли ва мақбул бўлиши зарурияти ётган эди”, – дейилади хабарда.

“Ватанимизнинг, халқимизнинг ҳақиқий жонкуярлари нега Korzinka.uz “саватча” эмас деб, майда чуйда таъна ва айбловларни қўйиш ўрнига ватанимизда бошқа мамлакатдардан қолишмайдиган, орзу-ҳавас ва шижоатлари билан халқимиз равнақига хизмат қилаётган тизим барпо этилаётганидан хурсанд бўлишлари керак, деб ўйлайман ва шундай кинояларидан вақтлари ортса, ўзлари хам халқимиз, давлатимиз келажаги йўлида баҳоли қудрат ўз улушларини қўшсалар анча мақсадга мувофиқ бўларди, деб ишонаман”, – хулоса қилди Ҳошимов.