Sony компаниясининг фотомодуллар ва видеоўйинлар сотилиши натижасида даромадлари бўйича 8 йил ичидаги энг катта натижани қайд этди. Бу ҳақда Reuters агентлиги хабар бермоқда.
2015 йилнинг июнида ёпилган дастлабки молиявий чоракда компания операцион даромадини 39 фоизга ошириб, 96.9 млрд иенага (780.8 млн доллар) етказди. Бу таҳлилчиларнинг тахминларидан 73.3 млн иенага кўпроқдир. Айни пайтда, олинган даромад 2007 йил апрель-июнь ойларидан буён қайд қилинган энг йирик натижа бўлди.
Sony’нинг соф фойдаси уч баробарга ошиб, 82.44 млрд иенани (665 млн доллар), тушум эса 1.81 трлн иенани (14.6 млрд доллар) ташкил этди.
Компаниянинг ўйин бизнесидаги операцион фойдаси 19.5 млрд иенага (157.3 млн доллар) етди (ўтган йилгидан 351 фоизга кўпроқ). Бунга нафақат PlayStation 4нинг харидоргирлиги, балки киберҳужумлар натижасида олинган суғурта тўловлари сабаб бўлди.
Шу билан бирга, доллар курсининг кўтарилиши Sony Mobile бўлинмасининг 22.9 млрд иена (184.7 млн доллар) операцион зарар кўришига олиб келди.