Тошкент шаҳар ҳокимлиги томонидан тўй маросимлари ўтказиш тартибига ўзгартиришлар киритилди.
“Яқинда бўлиб ўтган халқ депутатлари Тошкент шаҳар кенгашининг навбатдаги сессиясида тўйлар, оилавий маросимлар ва тантаналарни ўтказишни янада тартибга солиш масаласи кўриб чиқилди, – деди ҳокимлик ахборот хизмати раҳбари Ҳусан Эрматов. – Пойтахт аҳолисининг осойишталигини таъминлаш мақсадида шаҳардаги ресторан, кафе, тантаналар заллари, хусусий уйлар ва кўчаларда тўй, тантаналар ва бошқа маросимлар муносабати билан соат 23:00дан 6:00гача баланд овозда қўшиқ куйлаш, мусиқа ижро этиш, овоз кучайтирувчи воситалардан фойдаланиш ва бошқа хилдаги шовқинли овозлар чиқариш тақиқланади”.
Шунингдек, маълумот берилишича, йиғилишда шаҳар бўйлаб келин-куёвлар ва уларнинг яқинларининг сайр қилиши мобайнида йўл ҳаракати устидан назоратни кучайтириш, тўй-тантаналарни тартибли, камчиқим ва ортиқча дабдабалардан холи тарзда ўтказиш бўйича тушунтириш ишларини олиб бориш, бу борадаги тартиббузарлик ҳолатларини тегишли фуқаролар йиғинларида муҳокама қилиш лозимлиги таъкидланди.