3 август куни Бурятияда ўқотар қурол билан қуролланган 20 нафарга яқин номаълум шахслар нефрит сақланадиган корхона базасига босқинчилик қилди. Босқинчилардан бири ўлдирилган, деб хабар бермоқда республика ички ишлар бош бошқармаси матбуот хизмати.

“Воқеа ҳақидаги хабар полицияга хусусий қўриқлаш корхонаси ходими томонидан келиб тушди. Дастлабки маълумотларга кўра, қўриқлаш корхонаси ходимлари томонидан “Сайга” хизмат ўқотар қуроли қўлланиши оқибатида Орлик қишлоғида яшовчи, муқаддам судланмаган, ҳеч қаерда ишламайдиган 28 ёшли эркак олинган жароҳатлардан воқеа жойида ҳалок бўлган”, деб айтилади хабарда.

Босқинчилар воқеа жойидан қочиб кетишган. Ҳозирда уларни қидириш ишлари олиб борилмоқда.

Бурятида Россия нефрит захирасининг 90 фоизи, жумладан энг қимматбаҳо нави – оқ нефрит жамланган. Ҳар йили республикада ушбу минералдан 270 тонна олинади. Республика халқаро бозорга нефрит етказиб берувчи етакчи учликка киради. Шунингдек, Хитойга контрабанда қилинадиган нефритнинг асосий қисми шу ердан етказилади.
Нефрит заргарлик ва декоратив-бадиий буюмлар ясашда ишлатилади.