Россияда янги қўшин турини яратиш бўйича ишлар ўз ниҳоясига етказилди. Россия мудофаа вазири Сергей Шойгунинг таъкидлашича, эндиликда ҳарбий-ҳаво кучлари, ҳаво ҳужумига қарши мудофаа ва ҳаво-коинот мудофааси ҳарбий-коинот кучларига бирлаштирилди. Айнан шу қўшин тури Россиянинг ҳаводаги ва коинотдаги хавфсизлигини таъминлаш билан боғлиқ барча ишлар билан шуғулланади.

Ҳарбий-коинот кучлари авиация, ҳаво ҳужумига ва ракетага қарши мудофаа қўшинлари ва орбитага ҳарбий коинот қурилмаларини чиқаришга жавоб берувчи коинот кучлари ҳамда бошқа қўшимча кучларни бошқаради. Моҳиятан бу учта мустақил қўшин турининг биттага мужассамланганини акс эттиради.

Янги қўшин турига аввал ҳарбий-ҳаво кучларига қўмондонлик қилган генерал-полковник Виктор Бондарев бошчилик қилади.

Бугунги кунда Россия мудофаа вазирлиги учун ҳаво-коинот сарҳадларидаги хавфсизликни таъминлаш устувор вазифа ҳисобланади. Бир нечта қўшин турининг бирлаштирилиши бу вазифанинг самарадорлигини ошириши лозимлиги айтилган.

Ҳарбий экспертларнинг фикрича, ҳаво-коинот кучлари мамлакатнинг мудофаа қобилиятининг асосий элементларидан бирига айланади. Улар худди соябон каби Россия ҳудудини ҳаво-коинот ҳужумидан асрашга мўлжалланган.

Ҳаво-коинот кучларига янги ҳарбий техника намуналари етказиб берилиши аллақачон бошлаб юборилди. Ўтган йили ҳарбий-ҳаво кучлари 200та янги самолёт ва вертолёт билан таъминланди. Жорий йилда яна шунча техника етказилиши режалаштирилган. Шу билан биргаликда, янги қўшин турининг олдида ўз ечимини кутаётган бир қатор муаммолар ҳам турибди.