Россиянинг Ямал-Ненец мухтор округида Ноябрьск шаҳрида яшовчи аёлнинг Туркиядаги ўлими юзасидан терговгача текширув иши олиб борилмоқда.

49 ёшли аёл қизи билан Туркиянинг Кемер шаҳрида денгиз бўйида дам олиш пайтида Flyfish сув аттракционида учишга қарор қилди, бироқ бу “кўнгилхушлик” аёл ва унинг қизи учун аянчли тарзда якунланди.

Flyfish аттракциони катерга боғлаб қўйиб учириладиган ҳаво билан тўлдирилган катта матрасдан иборат бўлиб, катер ҳаракатланганда матрас бир неча метр юқорига кўтарилиб, кўпинча вертикал ҳолатга келиб, айланиб кетади ва ундаги одамларни сувга итқитиб юборади.

Аёл матрасдан сувга йиқилганда сув юзасига қаттиқ урилиши оқибатида қовурғасини синдириб олди. Синган суякнинг бир қисми унинг ўпкасини тешиб юборгани оқибатида аёл ҳалок бўлган.

Воқеа тафсилотлари аниқлаштирилмоқда. Аёлнинг қизи онасининг ўлимида зарур хавфсизлик чораларини кўрмаган аттракцион аниматорлари ва ўз вақтида ёрдамга етиб келмаган турк шифокорларини айбламоқда.