Буюк Британияда чоп этиладиган The Telegraph нашри “ПСЖ” клубининг швециялик ҳужумчиси Златан Иброҳимовични ҳаддан зиёд юқори баҳоланиб юборилган футболчилар рейтингига киритди. Ушбу рўйхат нашр сайтида келтирилган.

Рейтинг муаллифларининг фикрича, 2012 йилдан бери Франция чемпионатида тўп суриб келаётган швед “ўзи ўйлаганчалик яхши эмас”. Бунинг устига, Иброҳимович бирор марта Чемпионлар Лигасини ютмагани унинг фойдасига гапирмайди. Нашрнинг фикрича, спортчи майдондан кўра кўпроқ унинг ташқарисидаги ножўя хатти-ҳаракатлари билан ном чиқарган.

Иброҳимович ўзининг можароларга сабаб бўлувчи қилғилиқлари ва гаплари билан ном чиқарган, шу билан бирга у Швецияда катта ҳурматга эга. 2014 йилда футболчи 500 кг лик буғуни овда отиб ўлдиргани ҳайвонлар ҳимоячиларининг норозилигига сабаб бўлган, жорий йилнинг февралида эса у ўз жамоадошларига матбуот билан гаплашишни тақиқлаб қўйган. 2012 йилда спортчининг она тилисида zlatanera феъли пайдо бўлган, бу “майдонда ва унинг ташқарисида куч ишлатган ҳолда устунлик қилиш” маъносини англатади.
33 ёшли футболчи Швеция терма жамоаси тарихидаги энг яхши тўпурар (56 та тўп) ҳисобланади ва 8 марта Швециянинг йил ўйинчиси деб топилган.

Ушбу рўйхатга ўтган мавсумда 28 та ўйинда 4 та тўп урган “Ливерпуль” ҳужумчиси Марио Балотелли бошчилик қилмоқда.

Шунингдек, бу рейтингдан Жаҳон ва Европа чемпиони Серхио Рамос (9-ўрин), «Ливерпуль»нинг собиқ сардори Стивен Жеррард (11-ўрин), 1993 йилги «Олтин тўп» соҳиби, машҳур италиялик футболчи Роберто Баджо (12-ўрин) ва Грузияда икки бор йил ўйинчиси деб топилган Георгий Кинкладзе (20-ўрин) ҳам ўрин олган.