Устюрт газ-кимё мажмуаси қурилиши 2015 йилнинг сентябрида якунига етказилиши режалаштирилган, деб айтди Корея Республикасининг Ўзбекистондаги элчиси Ли Ук Хон.

Хоннинг айтишича, Жанубий Кореянинг илғор технологияси, капитали, бой тажрибаси ва ноу-хауси билан бирлашган Ўзбекистон энергетикаси ва бой табиий захиралари Ўзбекистон билан Жанубий Корея ўртасида сермаҳсул ҳамкорликнинг асосий соҳаларидан бири ҳисобланади.

Бу ҳамкорликка Сўрғил кони негизида 4 млрд долларлик Устюрт газ-кимё мажмуасининг қурилиши мисол бўла олади. Мажмуа қурилиши жорий йилнинг сентябрида якунига етказилиши режалаштирилган.

Жанубий Корея элчисининг айтишича, қўшма лойиҳалар қаторига “Uzbekistan GTL” суюлтирилган табиий газ ишлаб чиқариш заводи қурилиши, Қандим газни қайта ишлаш заводи, Толимаржон иссиқлик электр станцияси ва энергетик захираларни қайта ишлаш билан боғлиқ бошқа лойиҳаларни киритиш мумкин.

Устюрт газ-кимё мажмуасининг лойиҳавий қуввати йилига 4,5 млрд куб метр табиий газни қайта ишлашни, 4 млрд куб метр товар кўринишидаги газ, 387 минг тонна полиэтилен, 83 минг тонна полипропилен ва 102 минг тонна пиролиз бензин ишлаб чиқаришни кўзда тутади. Бу мажмуа Ўзбекистонда қурилган иккинчи шундай мажмуа бўлади. 2001 йилда Ўзбекистонда лойиҳавий қуввати йилига 125 минг тонна полиэтиленни ташкил қилувчи Шўртан газ-кимё мажмуаси фойдаланишга топширилган эди.