Малайзия пойтахти Куала-Лумпур шаҳрида ўтказилган Халқаро олимпия қўмитаси (ХОҚ)нинг 128-сессияси якунига етди. Бу ҳақда Ўзбекистон Миллий Олимпия қўмитаси матбуот хизмати хабар берди.

Сессия доирасида 2022 йилги қишки Олимпия ва Паралимпия ўйинларига мезбонлик қиладиган шаҳар овоз бериш орқали аниқланди. ХОҚнинг 85 нафар аъзоси иштирок этган овоз бериш жараёни якунига кўра 44 нафар аъзо Пекин шаҳри (Хитой) номзоди учун, 40 нафар аъзо эса Олма-Ота шаҳри (Қозоғистон) учун овоз беришган. Шу тариқа, Пекин шаҳри ҳам ёзги, ҳам қишки Олимпиада ўйинларига мезбон бўлган биринчи шаҳарга айланди.

Сессия ишида, шунингдек, 2014 йили Сочи (Россия)да ўтказилган XXII қишки Олимпия ўйинлари, 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпия ўйинлари, 2018 йилда Пхенчхан (Ж.Корея)да ўтказиладиган XXIII қишки Олимпиада ўйинлари, 2020 йилда Япония пойтахти Токиода ўтказиладиган XXXII ёзги Олимпиада ўйинлари, 2014 йили Хитойнинг Нанкин шаҳрида бўлиб ўтган иккинчи ўсмирлар ёзги Олимпиада ўйинлари, 2016 йили Лиллехаммер шаҳри (Норвегия)да ташкил этиладиган иккинчи қишки ўсмирлар Олимпиада ўйинлари ва ниҳоят, 2018 йили Аргентинанинг Буэнос-Айрес шаҳри мезбонлик қиладиган учинчи ёзги ўсмирлар Олимпиада ўйинларининг мувофиқлаштириш комиссияси ҳамда ташкилий қўмита аъзоларининг маърузалари тингланди.

Сессияда Бутунжаҳон спорт курашлари уюшмаси (UWW) президенти Ненад Лалович ва Зимбабве Миллий олимпия қўмитаси раҳбари Адмире Масенда ХОҚнинг аъзолигига сайландилар.

Бундан ташқари ХОҚнинг 14 нафар аъзоси навбатдаги саккиз йиллик муддатга қайта сайландилар.
- Монако қироли Альберт II, Монако
- Саид Шоҳид Али, Покистон
- Патрик Бауман, Швейцария
- Валерий Борзов, Украина
- Оттавио Чинкванта, Италия
- Наваль Эль Мутавакель, Марокаш
- Рене Фазель, Швейцария
- Патрик Хикки, Ирландия
- Вилли Кальтшмитт Лужан, Гватемала
- Гунилла Линдберг, Швеция
- Буюк герцог Люксембургский, Люксембург
- Рита Субово, Индонезия
- Ирена Шевиньска, Польша
- Чинг-Куо Ву, Тайвань

Миллий олимпия қўмитаси ассоциациясининг бош котиби Гунилла Линдберг ХОҚ ижроқўм аъзолигига навбатдаги муддатга сайланди.

ХОҚнинг 129-сессияси 2016 йил август ойида Рио-де-Жанейро шаҳрида ўтказилади.