Нью-Йоркдаги Халқаро савдо марказига яқин ҳудудда жойлашган тезкор ер ости темир йўли станциясида маҳаллий полиция туғруқ қабул қилди. Бу ҳақда CBS News хабар бермоқда.
Сешанба куни ҳомиладор аёл эри ва икки яшар ўғли билан туғруқхонага кетаётган эди. Аммо у туғруқхонага етиб бора олмади. Онанинг кўзи ёришига полиция зобити Брайан Макгро ёрдам берди.
Янги туғилган Арсенат Абдрабонинг вазни 3.1 кг ни ташкил қилди. Уни онаси билан бирга клиникага юборишди.
Нью-Йорк штати ҳокими Эндрю Куомо Твиттердаги саҳифаси орқали онани табриклади. Шунингдек, у Абдрабо 2001 йилнинг 11 сентябридан буён Халқаро савдо маркази ҳудудида туғилган биринчи бола эканлигини таъкидлади.