Ўзбекистонлик хонандалар Лола ва Тамила Facebook ижтимоий тармоғидаги “Жамоат назорати” (“Общественный контроль”) гуруҳидаги муҳокамалардан бирида иштирок этишди. Ушбу мавзу “Ўзбекнаво” эстрада бирлашмасининг хонандаларга лицензияларни қайтариб бериш нияти йўқлигига бағишланган эди.

Тамила муҳокама чоғида унинг лицензияси Zolim қўшиғига ишланган видеоклип туфайли тугатилганлигидан нолиди. Шунингдек, у муҳокамада иштирок этганларга уни қўллаб-қувватлаганлари учун миннатдорчилик билдирди.
“Ўзбекнаво” июль ойининг ўрталарида Лоланинг, августнинг бошида эса Тамиланинг лицензияларини тўхтатиб қўйди. Бирлашма вакили Одилжон Абдуқаҳҳоров Тамиланинг “бўлмағур” клиплар ишлаётгани, Лола эса “очиқ-сочиқ” кийинаётганини бунга сабаб қилиб кўрсатди.

Бундан ташқари, Абдуқаҳҳоров “Ўзбекнаво” қизларнинг хатти-ҳаракатларини кузатишда давом этаётганини ҳамда улар яхши томонга ўзгармаган тақдирда лицензиялар қайтарилмаслигини баён қилди.