Буюк Британияда истиқомат қилувчи Хильда Жексон ўзининг 101 ёшлик таваллуд аёмини FV432 танкини бошқариш билан нишонлади. Бу ҳақда The Telegraph нашри хабар бермоқда.

Собиқ ҳамшира ўз орзусини Жанубий Уэльсдаги танк мактабида рўёбга чиқарди. Аёлнинг 72 ёшли қизи Маргарет Остиннинг айтишича, унинг онаси бу орзусини бир неча йилдан бери амалга оширмоқчи бўлиб юрган. Кекса аёлни бу ниятидан ҳаттоки соғлиғидаги муаммолар ҳам қайтара олмаган.

Жексон ҳайдовчиликка қизиқади. 1950-йилларда у ўзининг австралиялик қариндошлари билан Европа бўйлаб 5 ойлик автосаёҳат амалга оширган.

Танк мактаби эгаси Алистер Скотт аёл уларнинг энг кекса мижозлари бўлганини айтди. “У бизнинг юракларимизни ва ҳайратимизни эгаллади”, деб айтди Скотт.

Аввалроқ экстремал спорт ихлосманди 101 ёшида янги рекорд ўрнатгани маълум қилинган эди.