Samsung Galaxy S6 ва Galaxy S6 Edge флагманларини бугунги кунга келиб, тарихдаги энг тез арзонлашиб кетган смартфонлар деб бемалол айтишимиз мумкин. 13 август куни бўлиб ўтадиган Unpacked тақдимотида расман намойиш этилиши кутилаётган Galaxy Note 5 фаблети сотуви олдидан, Samsung компанияси Galaxy S6 ва Galaxy S6 Edge смартфонлари нархини қарийб 100$ га арзонлаштирди.

Mail.ru берган хабарга кўра Eвропа бозорларида, ушбу икки флагман бир неча кундан буён арзонлаштирилган нархда сотилмоқда. АҚШ’нинг Т-mobile мобил оператори ҳам ҳар иккала смартфон нархини $100 га арзонлаштирди. Мисол учун, бундан бироз вақт олдин Galaxy S6’нинг 32 ГБ доимий хотирага эга варианти $669, 99 сотилган бўлса, бугунга келиб бу қурилмани Т-mobile мижозлари $569, 99 га харид қилишлари мумкин.

Samsung томонидан нархнинг ушбу кескин арзонлашуви Ўзбекистонда сотилаётган Galaxy S6 ва Galaxy S6 Edge смартфонларининг нархига таъсир қиладими ёқми бу ҳозирча номаълум.

Эслатиб ўтамиз, ҳозирги вақтда Тошкентнинг “Флешка” савдо бозоридан Galaxy S6 смартфонини 2,2 миллион сўмга, Galaxy S6 Edge’ни эса 2,9 миллион сўмга харид қилишингиз мумкин.