Россия ва Франция президентлари Владимир Путин ва Франсуа Олланд “Мистрал”лар қурилиши ва етказилиши бўйича шартномани тўхтатиш бўйича келишувга эришди. Бу борадаги телефон мулоқоти ҳақида Кремль матбуот хизмати маълумот берди.

Экспертлар ўртасидаги баҳс-мунозаралардан сўнг Франция авансни, шунингдек, Россияга тегишли асбоб-ускуна ва жиҳозларни қайтариши ҳақида келишувга эришилгани Кремль томонидан тасдиқланди. Таъкидланишича, Франция керакли маблағни Россиянинг тегишли ҳисобларига ўтказиб бўлди ва жиҳозлар қайтарилганидан сўнг кемаларга тўла эгалик қилиш ҳуқуқини қўлга киритади.

Ушбу маълумотлар Елисей саройи томонидан ҳам тасдиқланди.

Эслатиб ўтамиз, “Мистрал” тоифасидаги иккита вертолёт ташувчи кемаларни қуриш ва етказиш борасидаги 1.12 млрд евролик шартнома 2011 йил июнида имзоланган эди. Аммо Россияга нисбатан санкциялар жорий қилиниши муносабати билан Франция ушбу шартномани бир томонлама тўхтатишга қарор қилди.