Туркияда газ ва нефть қувурларини ҳимоя қилиш бўйича қўшимча чоралар кўрилди. Бу ҳақда Hurriyet нашри хабар бермоқда.

“Курд жангариларининг нефть ва газ қувурларига ҳужумларининг кўпайиши муносабати билан улар атрофида отлиқ патруллар қўйилади, тепловизорли камералар ўрнатилади”, – дейилади мақолада.

Экспертларнинг ҳисоб-китобларига қараганда, террорчиларнинг яқинда Шимолий Ироқ нефть конларини Туркиядаги экспорт терминаллари билан боғлайдиган қувурларга уюштирган ҳужуми Туркия иқтисодиётига 250 млн доллар зарар келтирган. Нефть траспортировкаси бир ҳафта деганда тикланди.

Туркияда ман қилинган Курдистон ишчи партияси июль ойида Туркия ҳарбийлари томонидан Сурия ва Ироқдаги базаларнинг ўққа тутилиши муносабати билан сулҳ шартномасини бекор қилиши ва ҳужумларни қайтадан авж олдиришини эълон қилди. Шундан буён мамлакат бўйлаб юзлаб террорчилик актлари содир этилди. Жангарилар деярли ҳар куни ҳужум уюштирмоқда.