2016 йилда Украина кино ишлаб чиқариш саноатини молиялаштириш учун 500 млн гривна (жорий курс бўйича 22,7 млн доллар) талаб этилади, деб айтди Украина кино масалалари бўйича давлат агентлиги раҳбари Филипп Ильенко.

“Кино саноати учун кейинги йилда 500 млн гривна, жорий йилнинг охиригача эса 120 млн гривна (5,5 млн доллар) керак бўлади. Жорий йилда бирорта ҳам янги лойиҳа бошламаймиз, баъзиларини эса молиялаштира олмаймиз. Жорий йилда чиқаришга тайёр лойиҳаларни якунлаш учун қўшимча маблағ талаб этилади”, деб айтди Ильенко онлайн-анжуманда.

Аввалроқ агентлик ҳукуматдан маҳаллий кинематографни ривожлантириш учун сарф-харажатларни кўпайтиришни сўраган эди. 2014 йилда агентлик мўлжаллангандан 100 млн гривна камроқ пул олган ва шунинг оқибатида мамлакатдаги кино саноати батамом тўхтаб қолган.

Украина давлат бюджетида 2015 йил дастурига кўра, “миллий фильмларни яратиш ва тарқатиш, “Александр Довженко миллий маркази”ни давлат томондан молиявий қўллаб-қувватлаш учун 66,82 гривна (3 млн доллар) ажратилган.