"Манчестер Юнайтед" бош мураббийи Луи ван Гал дарвозабон Давид Де Хеа Англия чемпионати 1 турида "Тоттенхэм"га қарши майдонга тушмаслигини маълум қилди. Мураббийнинг айтишича, "Реал"га ўтиши билан боғлиқ музокаралар дарвозабонга ўз таъсирини ўтказган.

"Биз машғулотлари ва ўйинлар вақтида уни кузатдик. Ҳозирги Де Хеа - ўтган мавсумдаги Де Хеа эмас. У ҳаракат қилмоқда, аммо унга осон бўлмаяпти. Биз жуда муҳим ўйинда майдонга тушишимиз керак ва барча футболчилар катта иштиёқ билан ўйнашини истайман. Де Хеа эса бундай қила олмайди.

Ҳа, у ўтган мавсумнинг энг яхши дарвозабони ва охирги уч йилда бизнинг энг асосий посбонимиз бўлиб келди. Мухлислар қаторасига икки йил давомида уни энг яхши, деб топдилар.

Мен уни кетишини истайман, деб ўйлайсизми? Ҳеч бир мураббий буни истамайди. Кўрамиз, трансфер мавсуми якунига етгач балки вазият ўзгарар. Кутиб туриш лозим. Мен ҳам вазият қурбониман. Шунингдек ўйинчи ва клуб ҳам вазият қурбони бўлиб турибди", - дейди мураббий.

Манба: Uff.uz