Япония халқаро ҳамкорлик ташкилоти (JICA) ва Ўзбекистон Ташқи иқтисодий алоқалар, инвестициялар ва савдо вазирлиги 7 августда “Инсон ресурларини ривожлантириш Ўзбек-Япон маркази негизида ишбилармон одамлар салоҳиятини ривожлантириш ва алоқаларни йўлга қўйиш (UJC)” техник ҳамкорлик лойиҳаси бўйича муҳокамалар баённомасини имзоладилар. Бу ҳақда “Газета.uz” га JICA’нинг Тошкентдаги ваколотхонаси маълум қилди.

Ҳужжатнинг имзоланиши UJC фаолиятини 2020 йилнинг 30 ноябригача узайтирилишини англатади. Муҳокамалар натижасига кўра, томонлар Ўзбекистон Ташқи иқтисодий алоқалар, инвестициялар ва савдо вазирлиги JICA билан ҳамкорликдаги лойиҳанинг амалга ошишига масъул ташкилот бўлишига келишиб олдилар.

UJC ўз фаолиятини 2000 йилнинг декабридан бери амалга ошириб келади ва Ўзбекистонда кичик ва ўрта бизнес салоҳиятини ошириш учун япон услубидаги менежмент бўйича турли амалий курслар ва анжуманлар тақдим қилиб келади.

UJC, шунингдек, япон тилидан ўқув курсларини ва ҳаттотлик, икебана ва оригами, чой маросимлари ва шу каби маданий алмашув тадбирларини ўтказиш орқали икки давлат ўртасидаги ўзаро ҳамжиҳатликни мустаҳкамлашга кўмак беради. Бундан ташқари, UJC имконияти чекланган одамларга компьютер саводхонлиги курсидан сабоқ беради.