Ўтган асрнинг 90-йилларида машҳур бўлган Spice Girls британ гуруҳи 2016 йилнинг бошида ўзининг биринчи Wannabe қўшиғи чиққанинг 20 йиллигини нишонлайди. Гуруҳ шу муносабат билан дунё бўйлаб жаҳон турнеси ўтказмоқчи.
Ҳозирда гуруҳнинг собиқ аъзолари Жерри Холлиуэл, Эмма Бантон, Мел Си ва Мел Би ушбу турнега тайёргарлик кўришни бошлаб юборишди, бироқ гуруҳнинг яна бир аъзоси – футболчи Дэвид Бэкхемнинг рафиқаси Виктория Бекхем ушбу лойиҳада иштирок этишдан қатъиян бош тортмоқда.
Шу билан бирга Виктория Бекхем гуруҳдаги барча қизлар билан муносабатлари яхшилигини ва уларга омад тилаб қолишини айтди.
Яқинда турмуш қурганининг 16 йиллигини нишонлаган Виктория ҳозирда ўзини тўлиқлигича турмуш ўртоғи ва оиласига бағишлаган. Шу муносабат билан у турнеда иштирок этиш учун оиласини тарк этишни истамаяпти ва боз устига қўшиқ куйлашга аллақачон иштиёқи сўниб бўлган.
Маълумот учун, гуруҳнинг расмий туғилган куни 1996 йил ҳисобланади. 1998 йилда гуруҳдан Жерри Холлиуэл кетгандан кейин гуруҳ яна бир неча йил квартет кўринишида иштирок этиб юргандан кейин, 2001 йилда батамом тарқаб кетган. 2012 йилда гуруҳ Лондондаги Олимпия ўйинларида иштирок этиш учун оз фурсатга яна бирлашганди.