Ер аҳолиси ҳозирги 7,3 млрд кишидан 2050 йилда 9,7 млрд гача ва асримиз охирига бориб 11,2 млрд кишига етиши прогноз қилинмоқда. Бундай рақамлар БМТнинг демография бўлими раҳбари Жон Уилмот томонидан 10 авгусда Сиэтлда бўлиб ўтаётган статистиклар анжуманида келтирилди.

БМТ мутахассисларининг фикрича, Ер аҳолисининг ўсиши Африканинг Саҳрои Кабирдан жанубдаги давлатларда туғилиш миқдори камайсагина тўхтатиши мумкин. Ҳозирча бунинг эҳтимоли 23 фоизга баҳоланмоқда.

Африка аҳолиси 2100 йилга бориб ҳозирги 1,2 млрд кишидан 3,4-5,6 млрд кишигача етиши кутилмоқда.

Осиё эса бу орада аҳоли энг зич жойлашган минтақага айланади: асримизнинг ўрталарига бориб Осиё аҳолиси 5,3 млрд кишига етади, сўнгра 4,9 млрд кишига тушиб кетади.

БМТ ҳисоботида қўллаб-қувватлаш потенциал коэффициенти: меҳнатга лаёқатли одамлар сонининг (20-64 ёш) пенсионерлар сонига (65 ёш ва ундан катталар) нисбати ҳам ҳисобга олинган. Бу коэффициент қанчалик кичик бўлса, меҳнатда банд одамлар меҳнатга лаёқатсиз аҳолини шунчалик кўп қўллаб-қувватлашига тўғри келади. Ҳозирда бу кўрсаткич Японияда энг кичик бўлмоқда (2,1), ундан кейин Италия (2,6) келмоқда.

2100 йилга бориб бу коэффициент бутун дунё бўйлаб кескин пасайиб кетиши кутилмоқда: мисол учун, Хитойда 7,1 дан 1,4 гача, Мексикада эса 8,7 дан 1,4 гача тушиб кетиши тахмин қилинмоқда.