Миллиардер Уоррен Баффеттга тегишли “Berkshire Hathaway” инвестицион холдинги аэрокосмика ва ҳарбий саноат учун металл конструкцияларини ишлаб чиқариш билан шуғулланувчи “Precision Castparts” корпорациясини 32 млрд доллар сотиб олиш бўйича келишувга эришди. “The Wall Street Journal” нашрининг қайд этишича, мазкур келишув компания тарихидаги энг йириги ҳисобланади.

“Berkshire Hathaway” “Precision Castparts”нинг 193,88 доллар турувчи акцияларини 21 фоиз мукофот пули билан 235 доллар қийматда сотиб олди. Корпорация улуши билан қўшиб ҳисобланганда, келишув қиймати 37,2 млрд долларни ташкил этади.

“Precision Castparts” мустаҳкам маҳкамловчи конструкциялар ва авиақурилиш учун турбина парраклари, шунингдек, электр станциялари ва нефть-газ соҳаси учун бошқа ускуналарни ишлаб чиқаради. Компания бош идораси АҚШнинг Орегон штати Портлед шаҳрида жойлашган.

Шу вақтга қадар “Berkshire Hathaway” “Precision Castparts”нинг 3 фоизига эгалик қилар эди. Келишув 2016 йилнинг биринчи чорагида ниҳоясига етганидан сўнг корпорация ўз номини сақлаб қолиши хабар қилинди.

Айни пайтда “Berkshire Hathaway”нинг бозор капитализацияси 363 млрд долларни ташкил этиб, ушбу кўрсаткичи билан холдинг дунёда 4 ўринни эгаллайди. Компания суғурта бизнеси, темир йўл транспорти, коммунал ташкилотлари, саноат ишлаб чиқариши, уй қурилиши, озиқ-овқат маҳсулотлари ишлаб чиқиш ва автомобил савдоси каби соҳаларга инвестициялар киритиш билан шуғулланади.