10 август куни Ўзбекистон президенти “Ўзбекистон Республикасининг айрим қонунчилик актларига ўзгартиш ва қўшимчалар киритиш тўғрисида”ги қонунни имзолади. Унга кўра, Маъмурий жавобгарлик тўғрисидаги кодексга, “Ўзбекистон Республикаси Вазирлар Маҳкамаси тўғрисида”ги, “Прокуратура тўғрисида”ги, “Меъёрий-ҳуқуқий актлар тўғрисида”ги қонунларга ҳам маълум ўзгартишлар киритилди.

Қонун парламентнинг қуйи палатаси томонидан 29 июль куни қабул қилиниб, 6 август куни Сенат томонидан маъқулланди. 11 август куни қонуннинг ОАВда эълон қилиниши билан у кучга кирди.

Хусусан, “Прокуратура тўғрисида”ги қонуннинг 14-моддасига иккита қўшимча банд киритилди.

Уларга кўра, эндиликда бош прокурор президентга давлат бошқаруви органлари ва ҳокимларнинг актларини уларнинг текширув мобайнида қонунчилик меъёрларига мос эмаслиги аниқланган тақдирда тўхтатиш ҳақида таклифлар киритиш ҳуқуқига эга бўлди.

Бундан ташқари, прокурор бундай актлар фуқароларнинг конституцион ҳуқуқ ва эркинликларини чеклаган тақдирда уларни тўхтатиш борасида таклифлар киритиши мумкин бўлади.