Вазирлар Маҳкамасининг қарори билан бюджет қонунчилигига риоя қилиш ва бюджет маблағларининг мақсадли сарфланиши устидан давлат назоратини янада кучайтириш мақсадида молия вазирлигининг “Назорат-тафтиш бош бошқармаси ва унинг ҳудудий назорат-тафтиш бошқармалари тўғрисида”ги низоми тасдиқланди.

Молия вазирлигининг назорат-тафтиш бош бошқармаси (НТББ) вазирлик марказий девонининг таркибий бўлинмаси ҳисобланади ва бевосита молия вазирига бўйсунади. Унинг филиаллари мамлакатнинг барча ҳудудларида мавжуд бўлади.

НТББ ва унинг ҳудудий бошқармаларининг асосий вазифаларига қуйидагилар юзасидан давлат назоратини амалга ошириш киради:
Бюджет ва смета-штат интизомига риоя қилиниши;
Ўзбекистон инвестиция дастуриларини амалга ошириш учун ажратиладиган маблағлардан мақсадли фойдаланилиши;
Республиканинг чет элдаги дипломатик муассасалари томонида чет эл валютасидаги маблағлардан фойдаланилиши;
Пенсиялар ва нафақаларнинг тўғри тайинланиши, ҳисобланиши ва ўз вақтида тўланиши.