Қозоғистон соғлиқни сақлаш ва ижтимоий ривожланиш вазирлиги 2016-2020 йилларда мамлакатда соғлиқни сақлаш соҳасини ривожлантиришга қаратилган “Денсовлиқ” дастури лойиҳасини ишлаб чиқди.

Унда оилавий тиббиёт принциплари, мажбурий тиббий суғурта ва молиялаштиришнинг янги моделлари жорий қилиниши кўзда тутилган.

Хусусан, Қозоғистон бош вазири Карим Масимовнинг расмий сайтида келтирилишича, биринчи тез тиббий ёрдам кўрсатиш соҳасида мижозларга оилавий хизмат кўрсатиш принципига босқичма-босқич ўтиш кўзда тутилган. Бу принцип инсон соғлиғини унинг умри давомида назорат қилиб боришни кўзда тутади.

Биринчи тиббий ёрдам кўрсатиш соҳасида, шунингдек, давлат кичик ва ўрта бизнесни ривожлантиришга урғу беради. Хусусан, амбулатор-поликлиника тармоғини қуриб, уларда кейинчалик хусусийлаштириш ҳуқуқи билан ваколатли бошқарув жорий қилиш режалаштирилмоқда.

Бундан ташқари, дастур доирасида хизматлар ва шифокорларга маош беришни молиялаштириш тизимини жиддий равишда такомиллаштириш назарда тутилган. Бунинг учун ижтимоий қўллаб-қувватлаш тизимидан фойдаланилади.

Дастурнинг яна бир асосий жиҳатларидан бири мажбурий тиббий суғуртанинг жорий қилиниши бўлади. Иш берувчи ва ишчи давлат билан бир қаторда тиббий муассасани молиялаштиришда иштирок этади. Маблағ асосан тизимда сифат ўзгаришлари ясашга йўналтирилади.

Бундан ташқари, умумий амалиёт шифокорлари миқдорини кўпайтириб, 1.5 минг кишига 1 нафар шифокор тўғри келишини таъминлаш, шифокорларнинг ўртача иш ҳақини ошириш, амбулатор дори таъминотини яхшилаш кўзда тутилмоқда.