Ўзбекистон президентининг 15 майидаги ПФ-4725 рақамли фармонига мувофиқ Вазирлар Маҳкамаси томонидан 31 июль куни қарор қабул қилиниб, якка тартибда тадбиркорлик фаолиятини амалга ошириш тартиби тўғрисидаги Низомга ўзгартишлар киритилди.

Эксперт Елена Ермохинанинг айтишича, низом юридик шахс яратилмайдиган оилавий тадбиркорлик субъектлари учун амал қилмайди.

Ўзгартишларга кўра, якка тартибда тадбиркорлик фаолиятини амалга ошираётган шахсларнинг ишчи ёллаш тартибига риоя қилиши давлат солиқ қўмитаси томонидан назорат қилинади.

Асосий янгилик эса қуйидагидан иборат: тадбиркор ишчи ёллаш учун дастлаб банк ҳисоби очиши талаб қилинади. Тадбиркор билан меҳнат муносабатларидаги жисмоний шахслар унинг номидан ҳужжат имзолаш ҳуқуқига эга бўлмайди ва якка тартибдаги тадбиркорлар сифатида кўрилмайди. Якка тартибда тадбиркорлик фаолиятини амалга ошираётган шахс бир неча турдаги хизматлар кўрсатаётган ёки фаолият амалга ошираётган тақдирда учдан ортиқ ишчи ёллаш ҳуқуқига эга эмас.