10 август куни Ўзбекистон президенти “Ўзбекистон Республикасининг айрим қонунчилик актларига ўзгартиш ва қўшимчалар киритиш тўғрисида”ги қонунни имзолади. Унга кўра, Маъмурий жавобгарлик тўғрисидаги кодексга, “Ўзбекистон Республикаси Вазирлар Маҳкамаси тўғрисида”ги, “Прокуратура тўғрисида”ги, “Меъёрий-ҳуқуқий актлар тўғрисида”ги қонунларга ҳам маълум ўзгартишлар киритилди.
Қонун парламентнинг қуйи палатаси томонидан 29 июль куни қабул қилиниб, 6 август куни Сенат томонидан маъқулланди. 11 август куни қонуннинг ОАВда эълон қилиниши билан у кучга кирди.
Қонун билан, шунингдек, “Ўзбекистон Республикаси фуқаролиги тўғрисида”ги қонунга қўшимча киритилди.
Қонуннинг янгиланган 21-моддасига кўра, “шахс жамият ва давлат манфаатларига жиддий зарар етказганда, хорижий давлат фойдасига фаолият юритганда ёки тинчлик ва хавфсизликка қарши жиноят содир этганда” фуқароликдан маҳрум қилиниши мумкин.
Ушбу тартиб президентнинг тегишли фармони эълон қилинган кундан кучга киради.