Вазирлар Маҳкамасининг жорий йилнинг 5 августдаги қарори асосида йўл транспорт инфратузилмасини такомиллаштириш учун 2015-2016 йилларда Тошкент шаҳридаги реконструкция ва таъмирланиши белгиланган шоҳкўчалар рўйхати тасдиқлангани ҳақида хабар қилган эдик.

Norma.uz сайти эксперт мутахассислари шоҳкўчалар ва уларга туташ ҳудудлардаги реконструкция ва таъмир, ободонлаштириш ва кўкаламзорлаштириш ишлари қайси давлат муассасалари ва ташкилотлари маблағлари эвазига олиб борилиши тўғрисида маълумот беришди. Унга кўра, рўйхатга киритилган шоҳкўчаларни реконструкция қилиш ва таъмирлаш ишлари қуйидаги маблағлар ҳисобига амалга оширилади:

Молия вазирлиги қошидаги Республика йўл жамғармаси – йўл кўтармалари, шу жумладан, суғориш ирригация тизимлари, пиёдалар йўлаклари, кўприклар, ер ости пиёдалар ўтиш йўллари, шоҳкўчалар атрофидани кўкаламзорлаштириш ва ёритиш;

Маҳаллий бюджет ва қонунчиликда тақиқланмаган бошқа маблағлар – шоҳкўчалар бўйлаб жойлашган ҳудудларнинг архитектуравий қиёфасини янгилаш ва ободонлаштириш, жумладан, пиёдалар йўлаклари, фавворалар, ёритиш, суғориш ирригация тизимлари, давлат ҳисобидаги ижтимоий аҳамиятга молик иншоотларни таъмирлаш ва барпо этиш, кўкаламзорлаштириш ишлари, турар жой биноларининг олд ва том қисмларини капитал таъмирлаш, шунингдек, зарурат туғилган тақдирда, йўл четларидаги объектларни бузиб ташлаш;

Ўз балансида сақлаётган ва фойдаланаётган ташкилотларнинг шахсий маблағлари – муҳандислик коммуникацияларининг кўчирилиши, шунингдек, шоҳкўчалар бўйлаб жойлашган нотурар бино ва иншоотларнинг олд ва том қисмини капитал таъмирлаш.

Шунингдек, қарорда Иқтисодиёт вазирлиги, “Ўзқурилишматериаллари” АК, “Ўзметкомбинат” ОАЖ ва “Ўзнефтгаз” МХКга буюртмачилар ҳамда лойиҳа бош ташкилотчисининг асосланган ҳужжатлари асосида цемент, металл прокат ва йўл битуми, дизел ёнилғисини белгиланган нархлар ва комиссия шартномалари асосида ажратиш вазифаси юклатилган.