“Формула-1” жамоаларининг умумий бюджети 2015 йилда 2,6 млрд еврони ташкил қилди. Автопойганинг энг бой жамоаси 468,7 млн еврога эга Red Bull жамоаси бўлмоқда. Бу маълумотлар El Mundo Deportivo испан газетаси томонидан чоп этилди.

2-ўринни Mercedes AMG жамоаси эгаллади. Немис жамоаси маблағи бўйича “Ред Булл”га 1 млн еврога устунликни бой берди, унинг бюджети 467,4 млн еврони ташкил қилди. 3-ўринни McLaren жамоаси эгаллади (465 млн евро).

4-ўринни Ferrari жамоаси (418 млн евро), 5-ўринни Williams (186,4 млн евро), 6-ўринни Lotus жамоаси (139,1 млн евро), 7-ўринни Toro Rosso (137,45 млн евро), 8-ўринни Force India (129,7 млн евро), 9-ўринни Sauber (103,25 млн евро) ва охирги ўринни 83 млн еврога эга Manor жамоаси эгаллади.

Шунингдек, пойгачиларнинг 2015 йилдаги маошлари ҳам маълум қилинди. Ҳаммадан кўра кўпроқ даромадни 2014 йил каби бу йилда ҳам Фернандо Алонсо топади. Пойгачи Ferrari’дан McLaren’га ўтгандан кейин маоши 12 млн еврога ошиб, 35 млн еврони ташкил қилмоқда.

Автопойганинг амалдаги чемпиони Льюис Хэмилтон (Mercedes AMG жамоаси) жорий йилда 25 млн евро, яъни ўтган йилга нисбатан 5 млн евро кўпроқ маош олади. Red Bull’дан Ferrari’га ўтган пойгачи Себастьян Феттелнинг маоши 6 млн еврога ошиб, 28 млн еврони ташкил қилмоқда.

Россиялик автопойгачи Даниил Квят Toro Rosso’дан Red Bull’га ўтгандан кейин маоши 250 минг евродан 750 минг еврогача ошди. Квят маошининг миқдори бўйича 20 та пойгачи орасида 14-ўринни эгалламоқда. “Формула-1”да энг кам маошни Manor пойгачиси Роберто Мери олмоқда, унинг маоши йилига 50 минг еврони ташкил қилмоқда.

2015 йилги “Формула-1” пойгаси 29 ноябрда Абу-Дабида ўз ниҳоясига етади. Пойганинг яқин орадаги босқичи 22-23 август кунлари Бельгияда бўлиб ўтади. Айни пайтда пойгада 10 та босқичдан кейин Льюис Хэмилтон етакчилик қилмоқда.