Сан-Францискода иш бошлаган Nebia стартапига Apple бош директори Тим Кук инвестиция киритди. The New York Times нашрининг ёзишича, ушбу компания душлар учун сув тежовчи махсус учликлар яратиш билан шуғулланмоқда.
Лойиҳанинг бошқа инвесторлари сирасида Y Combinator стартапи, Schmidt Family Foundation жамғармаси ва Battery клуби асосчиси Майкл Бирчлар бор.
Nebia киритилган инвестицияларнинг аниқ ҳажмини ошкор қилмаяпти.
Ҳозирча штатида олти киши бўлган компания сув сарфини 70 фоизга қисқартирадиган махсус учликлар яратиш билан шуғулланмоқда. Инсоннинг ювинишига ўртача 75 л сув кетади, Nebia таклиф қилаётган технология қўлланганда эса бу кўрсаткич 23 л гача пасаяди.
Ишланма механизми сув оқимини майда томчиларга бўлиб юборади, бу сочилиш майдонини кенгайтиради. Сув оқими туманга ўхшайди. Дарвоқеа компаниянинг номи ҳам итальянча nebbia “туман” сўзидан олинган.
Nebia, шунингдек, Kickstarter кампаниясини ишга туширди. Ушбу кампания 8 соат ичида керакли 100 минг долларни тўплай олди. Маблағ тўплаш 2015 йил 11 сентябрига қадар давом этади. Бу давр ичида Kickstarter платформасига 300 доллар киритган ҳар қандай киши душ учликларини олдиндан буюртма қила олади.