Ўзбекистон Республикаси Соғлиқни сақлаш вазирлиги маълумотларига кўра, Ислом тараққиёт банки (ИТБ) Ўзбекистон Республикаси ҳукуматига Давлат санитария эпидемиология назорат хизматини модернизация қилиш учун 17,4 млн доллар ажратди.

ИТБ маблағлари мамлакатдаги мавжуд 157 та давлат санитар-гигиеник лабораторияни модернизация қилиш учун зарур қурилмаларни сотиб олишга йўналтирилади.

2015 йил 26 июнда қабул қилинган “Республика санитария-эпидемиология хизмати фаолиятини ва уни малакали кадрлар билан таъминлаш тизимини янада такомиллаштириш чора-тадбирлари тўғрисида"ги Ўзбекистон Республикаси Вазирлар Маҳкамаси қарорида ҳам аҳолининг санитария-эпидемиологик ҳолатини яхшилаш бўйича чора-тадбирлар белгиланган эди.

Унда қайд этилганидек, айни пайтда Давлат санитария эпидемиология назорат марказларининг замонавий ускуналар билан таъминланиши 60-70 фоизни, шифокор-кадрлар билан таъминланиши эса 84,4 фоизни ташкил этади.

Бундан аввалроқ эса Ўзбекистон ҳукуматининг 2015 йил 31 июлдаги қарори асосида Соғлиқни сақлаш вазирлиги раҳбарлиги остида 2015-2016 йилларда республикада халқаро тиббий-санитар қоидалар жорий этилиши хабар қилинган эди. Халқаро тиббий-санитар қоидалар халқаро ҳамжамиятга касалликларнинг глобал миқёсда тарқалишига қарши жавоб чораларини кўриш ва уларни тўхтатишида кўмак кўрсатади.