Испаниянинг Толедо вилоятидаги Вильясека-да-ла-Сагра аҳоли пунктида номи ошкор этилмаётган 32 ёшли эркак буқа билан сельфига тушиш пайтида ҳалок бўлди, деб хабар бермоқда Cadena Ser нашри. 

Бу фожиа шаҳар аҳолиси тор кўчалар бўйлаб югураётган буқалардан қочиши билан кечадиган анъанавий халқ ўйини вақтида содир бўлди. Бундай ўйинларда иштирок этишда катта тажрибага эга бўлган эркак бироз хаёллаб, катта тезликда чопаётган буқа билан ўзи орасидаги масофани тўғри чамалай олмади. Натижада буқа шохлари билан эркакнинг бўйни ва сонига кучли зарба бериши оқибатида у ҳалок бўлди. Жабрланувчи зудлик билан шифохонага олиб борилганига қарамасдан, шифокорлар унинг тирик қолиши учун ёрдам бера олишмади.

Фожиа туфайли шаҳар ҳокимияти бир ҳафта давом этиши керак бўлган халқ сайлини бекор қилди. Аҳоли пункти мэрининг айтишича, қурбон бўлган шахс қўшни Вильясекильядан ташриф буюрган эди.

Хавфсизлик федерал муассасалари вакиллари шаҳар ҳокимиятини бундай “ваҳшиёна” удумдан воз кечишга мунтазам чақиришига қарамасдан, испанлар уларнинг ҳаётига хавф солувчи бу ўйиндан воз кечишни исташмаяпти.

2014 йилнинг февраль ойида АҚШнинг Хьюстон шаҳрида ҳам ғазабланган буқа билан сельфига тушмоқчи бўлганда ҳалок бўлишига бир бахя қолган “ўткир ҳислар мухлиси” бутун дунёга машҳур бўлиб кетганди.