Ўзбекистон ва Корея халқ таълим вазирликлари 29 июль куни мактаб синфларида интеллектуал рақамли аппаратлар билан жиҳозланган бошқарув тизимлари яратиш бўйича шартнома имзолашди. Бу ҳақда Review.uz сайти хабар бермоқда.
“Ақлли” синфхоналар лойиҳаси Корея таълим вазирлигининг ривожланиш кўмаги дастурининг бир қисмидир. 2011-2014 йилларда бу лойиҳа 9 мамлакатда, шу жумладан, Бруней, Колумбия, Индонезия, Мўғулистон, Филиппин, Камбожа, Озарбайжон, Шри-Ланка ва Парагвайда жорий қилинди. Жорий йилнинг 22 июль куни бундай шартнома Вьетнам билан имзоланди.
Лойиҳа доирасида Корея оқ электрон ёзув тахталари, ноутбуклар учун тагликлар сингари ўқув қуролларини тақдим этади. Материаллар ҳар бир мамлакатнинг таълим тизимини эътиборга олган ҳолда турлича бўлиши мумкин. Дастурни қўллаб-қувватлаш учун экспертлар юборилади, улар бундай синфхоналардан фойдаланиш борасида маърузалар ўтишади.