Мирободдаги уйларнинг биридан 12 млн сўмлик буюмлар ва 2 200 доллар ўғирлаб кетилди. Бу ҳақда “Огоҳ” нашри ёзмоқда.
Айтилишича, асли самарқандлик Жамшид исмли йигит бир муддат Қўйлиқ бозорида бир нечта ўртоғи билан биргаликда савдогарлик қилиб келган. Дастлаб яхши пул топа бошлаган Жамшид бир неча ойдан сўнг даромаднинг тушиши натижасида пулсиз қолган.
Шунда у тасодифан очиқ қолиб кетган уйларнинг бирига ўғирликка кириб, у ердан турли заргарлик буюмлари, кийим-кечакни, шунингдек, 2 200 доллар пулни ўғирлаб чиқиб кетган.
Уй эгаларининг мурожаати бўйича ўтказилган суриштирув натижасида жиноятчи тезда қўлга олинган ва айбига иқрор бўлган. Унинг етказган моддий зарари, долларни ҳисобга олмаганда, 12 млн сўмни ташкил қилган.