Ўзбекистон хорижий инвесторларга маҳаллий электрон саноатининг байроқдорларидан ҳисобланган “Фотон” АЖнинг 32,3 фоиз акциясини сотади. Корхонанинг 51 фоиз акцияси “Ўзэлтехсаноат” АК ихтиёрида қолади. 

Ўзбекистон Давлат рақобат қўмитаси 2008 йил апрелда ушбу корхонанинг 76 фоиз акциясини сотишга тендер эълон қилган эди. 76 фоиз акцияларнинг дастлабки нархи 14,8 млн доллар қилиб белгиланган эди. Тендер ғолиби ўз зиммасига 13,5 млн долларлик инвестицион лойиҳаларни олиши керак эди.

“Фотон” заводи 1941 йилда уруш пайтида Тошкентга эвакуация қилинган Москва вилоятининг Фрязино шаҳридаги электр-вакуум асбоблар заводи негизида ташкил қилинган. 1942 йилдан завод Тошкентда илк маҳсулотлари – электрон генераторлар ва лампалар кучайтиргичлари ишлаб чиқара бошлаган. 1965 йилда корхона технологияси яримўтказгичли асбоблар ва интеграл микросхемалар ишлаб чиқариш учун қайта ихтисослаштирилган. 1994 йилдан корхона электрон ва радиоэлектрон буюмлар ишлаб чиқаришга қайта ихтисослаштирилган. Корхонада электрон назорат-касса машиналари, рангли телевизорлар, энергия тежовчи лампалар, диод-каскадли трансформаторлар ишлаб чиқариш ўзлаштириб олинган. 

2012 йилда ҳукумат қарори билан “Фотон” электр-техника заводи янги жойга – “Алгоритм” АЖнинг бўш ишлаб чиқариш майдонларига кўчирилди.