Хитойнинг Icona автомобилсозлик компанияси 2013 йил илк бор Шанхай автосалонида намойиш қилинган ўзининг кичик серияли Vulcano суперкарининг янги версиясининг расмий суратини намойиш қилди. Машина янги модификацияда карбон элементларга эга титан кузов билан жиҳозланди.

Титандан ишланган “Вулқон” 10 августда эълон қилинди. Шу куни чоп этилган суратларда машинанинг бўялмаган намунаси намойиш қилинди. Энди бир дона нусхада ишлаб чиқарилган машина қизил рангда кўрсатилди.

Автомобилни яратиш билан Toyota, Maserati ва Lancia компаниялари билан ҳамкорлик қилувчи Туриндаги Cecomp кузов ательеси шуғулланди. Кузов элементлари титандан дастаки усулда тайёрланди, уларни яратиш учун ишчилар 1000 соат вақт сарфлашди. Янги машинанинг оғирлиги 1590 кг ни ташкил қилди.

Машинанинг 670 от кучига эга двигателини Scuderia Ferrari’нинг собиқ муҳандиси Клаудио Ломбарди яратди. Двигатель Chevrolet Corvette ZR1 машинасининг 6,2-литрли 8 цилиндрли двигатели асосида ясалди. Мижознинг истагига кўра двигателнинг қувватини 1000 от кучига етказиш мумкин. “Вулқон” 0 дан 100 км/соатгача 2,8 сонияда эришади, максимал тезлиги соатига 354 км ни ташкил қилади.

Суперкар 16 августда АҚШнинг Пеббл-Бич шаҳрида ўтадиган башанглик танловида омма ихтиёрига намойиш қилинади. Шу танловда Icona компанияси Vulcano’нинг дизайни Lockheed SR-71 Blackbird разведкачи самолёти услубида бажарилган такомиллаштирилган версиясини ҳам намойиш қилади.